विश्व स्वास्थ्य संगठनको चेतावनीः टर्की भूकम्पमा २० हजार भन्दा बढीको मृत्यु हुनसक्ने

काठमाडौँ । टर्कीमा गएको शक्तिशाली भूकम्पमा परी मृत्यु हुनेको संख्या ५ हजार पुगेको छ।

टर्की र सिरियाको सीमा क्षेत्रमा सोमबार बिहान गएको भूकम्पमा परी ज्यान गुमाउनेको संख्या ५ हजार पुगेको अन्तर्राष्ट्रिय सञ्चारमाध्यमले जनाएका छन्। साथै हजारौं भवनहरू ध्वस्त भएका छन्।

कठिन अवस्था, चिसो तापक्रम र क्षतिग्रस्त सडकहरूका कारणले उद्धार कार्यमा समस्या भइरहेको समाचारमा उल्लेख छ।

यस क्षेत्रमा भूकम्प गएको एक दिनपछि मंगलबार पनि दक्षिणी टर्की र उत्तरी सिरियामा दर्जनौं शक्तिशाली पराकम्पनहरू गएको थियो।

अमेरिकी जियोलोजिकल सर्वेका अनुसार सोमबार बिहान ७।५ रेक्टर स्केलको भूकम्प गएको हो। विश्व स्वास्थ्य संगठनले मृत्यु हुनेको संख्या २० हजार भन्दा बढी हुन सक्ने चेतावनी दिएको छ।

मंगलबार बिहान टर्कीका उपराष्ट्रपति फुआत ओक्तेले भूकम्पमा ३ हजार ४१९ जनाको ज्यान गएको र २० हजार ५३४ जना घाइते भएको बताएका थिए । सिरियाको सिरियामा पुष्टि भएका मृत्युको संख्या १ हजार ६०२ पुगेको छ भने दुबै देशमा मृत्यु हुनेको संख्या ५ हजार ०२१ पुगेको छ।

टर्कीको प्रकोप व्यवस्थापन एजेन्सीले ११ हजार ३४२ भवनहरू ध्वस्त भएको रिपोर्ट गरेको छ जसमध्ये ५ हजार ७७५ भवन ध्वस्त भएको पुष्टि भएको छ।

उत्तरी सिरियामा स्वयंसेवी उद्धारकर्ताहरूले उनीहरूसँग केही आधारभूत इन्धन र घरको भग्नावशेषमुनि फसेकाहरूलाई निकाल्न आवश्यक पर्ने अन्य प्रावधानहरू नभएको बताएका छन्।

ठूलो संख्यामा मानिसहरू भग्नावशेषमा फसेको र बाँचेकाहरूलाई खोज्ने प्रयासमा चिसो मौसम, खराब इन्टरनेट, क्षतिग्रस्त सडक लगायतले उद्धार टोलीलाई बाधा पुर्‍याएको बताइएको छ। (एजेन्सी)