समयमै पाठ्यपुस्तक उपलब्ध गराउन सरकारलाई समितिको निर्देशन

काठमाडौं, माघ ९ गते । संसदीय समितिले आगामी शैक्षिक सत्रमा समयमै सबै विद्यालयहरूले पाठ्यपुस्तक पाउनेगरी व्यवस्था मिलाउन सरकारलाई निर्देशन दिएको छ । सङ्घीय संसद् राष्ट्रियसभाअन्तर्गतको दिगो विकास तथा सुशासन समितिको सोमबार सिंहदरबारमा बसेको बैठकले आगामी शैक्षिक सत्रका लागि पाठ्यपुस्तक उपलब्ध हुने कुराको सुनिश्चित गर्न शिक्षा, विज्ञान तथा प्रविधि मन्त्रालयलाई निर्देशन दिएको हो ।

सम्बन्धित मन्त्रालय र मातहतका निकायहरूसँग गहन छलफल गरी समयमा विद्यालयहरूले पाठ्यपुस्तक पाउने कुराको सुनिश्चित गर्न सरकारलाई निर्देश गरिएको समितिका सभापति प्रकाश पन्थले जानकारी दिनुभयो ।

उहाँले भन्नु भयो, ‘‘सम्बन्धित निकायसँग गहन छलफल गरियो । र आगामी शैक्षिक सत्रमा सबै विद्यार्थीहरूले समयमै पाठ्यपुस्तक पाउने कुराको सुनिश्चित गर्नका लागि हामीले शिक्षा, विज्ञान तथा प्रविधिमन्त्री  माननीय शिशिर खनालज्यू, मन्त्रालय र सम्बद्ध निकायलाई निर्देशन जारी गरेका छौँ ।’’

बैठकमा विश्व निकेतन माध्यमिक विद्यालयका प्रधानाध्यापक हेरम्बराज कँडेलले आगामी शैक्षिक सत्रबाट समयमै पाठ्यपुस्तक उपलब्ध हुने व्यवस्था गर्न सरकारसँग माग गर्नुभयो ।

उहाँले गत वर्ष कक्षा १० को स्वास्थ्य, जनसङ्ख्या र वातावरण तथा कक्षा ८ को नैतिक शिक्षा असोजसम्म पनि नपाएको उल्लेख गर्दै अब त्यस्तो नहोस् भन्ने कुरामा सम्बन्धित निकायलाई ध्यान दिनुपर्ने बताउनुभयो ।

प्रधानाध्यापक कँडेलले कागजको अभाव देखाएर आगामी शैक्षिक सत्रमा पनि पाठ्यपुस्तकको समयमै उपलब्धता गराउन नसक्ने अवस्थाको तत्काल अन्त्य हुने गरी कागज खरिदका लागि जिटुजी विधि अपनाउँदा उपयुक्त हुने सुझाव समेत दिनुभयो ।

‘‘‘यस पाली चाहिँ २०८० को शैक्षिक सत्रमा चाहिँ सुरुमै विद्यार्थीको हातमा पर्छ कि भनेर आशा गरौँ । र नत्र यो बहाना बन्छ । २०७२/०७३ मा भूकम्पको बहाना बनाइयो । त्यसपछि २०७६ र २०७७ मा कोभिडलाई दोष दिइयो । २०७८ मा आएपछि मत पत्र छपाई भनियो । अहिले कागजको बहाना बनाइएको छ । यसलाई फाष्ट ट्र्याक विधिबाट जिटुजी विधिबाट सार्वजनिक खरिद ऐनलाई पनि सहज बनाएर यो काम गर्नु पर्दछ ।,’’ प्रधानाध्यापक कँडेलले भन्नुभयो, ‘‘अर्को काठमाडौंमै गत वर्ष असोज मसान्तसम्म पनि विश्व निकेतन माध्यमिक विद्यालयमा कक्षा १० को स्वास्थ्य तथा जनसङ्ख्या  र वातावरण, कक्षा ८ को नैतिक शिक्षा पाउन सकिएन । बाहिरका अन्य ठाउँहरूका झन् कस्तो होला । अहिले चाहिँ पाउने गरी के हुन सक्दछ, स्पष्ट योजना बनाइयोस् भनेर अनुरोध गर्दछु ।’’

त्यस्तै, जनक शिक्षा सामग्री केन्द्रका प्रबन्ध निर्देशक अनिलकुमार झाले समयमै पाठ्यपुस्तक विद्यालयहरूलाई उपलब्ध गराउने गरी आफूहरूले काम गरिरहेको बताउनुभयो । उहाँले त्यसका लागि कागजको समेत अभाव नहुने गरी व्यवस्थापन भइरहेको समितिलाई जानकारी दिनुभयो ।

प्रबन्ध निर्देशक झाले भन्नुभयो, ‘‘निरन्तर रूपमा कागजको आपूर्ति भइरहेको छ । छपाई मेसिन पनि थपिएको छ । अव छपाई क्षमतामा पनि समस्या छैन । म्यान पावरमा पनि समस्या छैन । समय कम भएकाले सबै कर्मचारीहरूले मिलेर काम गरिरहेका छौँ ।’’ जनक शिक्षा सामग्री केन्द्रले पाठ्यपुस्तक छपाइका लागि थप मेसिनहरूको पनि व्यवस्था गरिएको जनाएको छ ।